huett simer gone Cholegruebe aluege. Chole isch i dere Region hie zimlech wichtig. Dae Bezirk, wo mir hie si, 'produziert' 3% vor Energie vor ganze Waeut duer Chole, das heisst zimli viu. =)
Zersch mues mau d'Aerde entfernt waerde, wo saech no oberhaub vor Chole befindet. Naer chunnt gloubs no sone Zwuescheschicht u de chunnt mae zur Chole. D'Choleschicht saeuber isch de oeppe 10 Meter dick. Die wird de nadisnah abtreit und mit riisige Fahrzueg transportiert. D'Chole wird de uf Gueterzueg verlade, wo guet u gaern hundert Waege hei. Ja, da chame de lang warte am Bahnuebergang. =)
uf daem Biud gseht mae dae Teu, wo scho isch abtreit worde.
hie gseht der eine vo dae Trucks. Dae gseht itz vilech nid so gross us, aber d'Raeder saeuber si scho 4 Meter hoech. Leider hets mer nid glaengt, es Foto ds Schiesse, wo ae Pick-up grad sone Truck gchruetzt het, suesch haett mae d'Verhaeutnis gseh. Ae Pick-up gseht auso diraekt chli us naebe somene Fahrzueg.
Vori bini grad vom Rodeo heicho. Ds nationale High School Rodeo Finau fingt das Jahr hie bi ues ir Stadt statt. Das heisst da choeme di beschte Cowboys und Cowgirls vo jedem Bundesstaat (es het zwar gloubs nid vo ganz aune Luet, wo choeme). Es het ono Luet vo Kanada und Oustralie, das heisst es isch scho fasch waeutwiit.
Insgesamt mache ueber 1000 Luet mit.
Es git bim Rodeo verschiedeni 'events'. Es git 'bull riding', 'barrel racing', 'goat tying', ...
'Bull riding' het mi oeppe am iidruecklechschte duenkt. Wies der Name scho seit, hocket dr Cowboy ufem Stier obe und soett im Ideaufau 8 Sekunde dobeblibe, was vilech nach weni toent, aber zimlech viu isch, weme ufemene gumpende Stier hocket...
Teu vo oeich si vilech scho ar BEA gsi u hei doert ufemene Plastikstier Rodeo gmacht. Das hie isch eich vom Prinzip haer ds gliche, nur isch dr Stier aecht.
Itz fraget dir oeich sicher, wie dass mae dr Stier zum umegumpe u draeie bringt. Da bingt mae es Seili ume Buch, das heisst vor dae Hingerbei. U da d'Stiere das nid gaern hei, gumpe si naer so im Zueg dsume. Dr Riter saeuber mues immer ei Hang frei ha und soetti gloubs o chli zrugglaehne. Bi daem 'event' het aer naer nur es Seili, woner um ds Handglaenk umewicklet und feschthaebt. Bewaertet wird dr Riter und der Stier. Das heisst, dr Riter berchunnt Puenkt, wenn aer gnue lang dobe blibt. Bim Stier isches so, dass es meh Puenkt git, wenn aer sech draeit und vorwaerts u rueckwaerts geit, aus wenn aer meh oder weniger gradus rennt.
Wenn ae Cowboy drum naer mitem Stier nid ds fride isch, de chaner ae angere fordere und nomau rite.
Ds ganze louft zimlech schnaeu ab und es cha o zimlech schnaeu Verletzige gaeh, so hets oemu mi duenkt... Es het aber immer oeppe drue Riter uf Roesser wo dr Stier jage, faus er d'Arena nid vo saeuber verlat oder so. Und de hets ono d''bull fighters', das si die, wo sech vore Stier steue, um nae ufdshaute u zruegg id Box ds laenke. Pretty tough guys... dae Job wetti ig auso nid, um ehrlech ds si. =)
Leider het mini Kamera dr Geischt ufgaeh, aber ha immerhin zwoei verschiedeni 'events' choenne fiume. Die ladi itz aber nid ufe, doerft sae aber gaern mau luege, we daer Luscht uf chli Wiude Weschte heit. =)
So, das waers gloub fuer huett und ig mues mau go pfuse...
Keine Kommentare:
Kommentar veröffentlichen