Safely arrived

Hi everyone

so, i hocke deheime a mim Puut und verfasse dä Post, das heisst, ig bi heil acho. =)
D`Reis mit aune füf Kiddos isch super gange und mir hei o keni grössere Problem gha. Es isch auso ke Flug gstriche worde, wie das ja mängisch vorchunnt... =)
Nur dr Flug vo Atlanta uf Züri het öppe e Stung Verspätig gha. Zersch isches im Flugzüg öppe 90°F (=32°C) gsi u drum heisis no müesse abechüele und teu Lüüt, wo scho si igstige, hei nomau müesse usecho. Nachemene Ziitli isch de das Problem behobe gsi und mir hei chönne istige. Wie bi jedem Flug uf dr Heireis hets bim Iscanne vo mim Boarding Pass pipset, drum heisi när aubes eifach dr Strichcode abtrennt. Ds Atlanta het die Agschteuti vorem Boarding no öpis vomene grüene Formular gseit, woni bir Iireis hätti söue bercho ha, was aber nid der Fau gsi isch. Bi ömu de o oni das Formular a Bord gla worde...
Wo mir de im Landeaflug gsi si, hei mir es wunderschöns Bärgpanorama ds gseh bercho. Leider het mä de grad müesse di elektronische Grät abschaute, süsch hätti no schnäu ä Schnappschuss gmacht, i cha nur sägä wow, wow, wow!
Ds Züri bir Gepäckusgab hets de gheisse, "... , Shober, Keller, ..." söui sich bitte bim Schauter mäude. Das heimer de gmacht und usegfunge, dass au üses Gepäck no ds Atlanta isch. Üs isch aber bestätiget worde, dass es morn mitem gliche Flug, wie mir hütt gno hei, sötti uf Züri cho u üs när per Poscht morn im Verlouf vom Nami zuegliferet wird.
Ja, itz wüsset der, werum mä immer ds Auernötigschte sötti im Handgepäck ha: wüu a) dr Flug plötzlech gstriche wird oder b) ds Gepäck nid isch acho.
Ds Natelladegrät im Handgepäck ds ha isch o vo Vorteu, faus mä öper sött erreiche, weme nöime isch stecke blibe...
(D`Sarah, das Modi woni ds Minneapolis ha kenne glert, het äbä ihres Ufladegrät nid im Handgepäck gha und ihres Handy isch fasch tod gsi.)
Itz hani ömu zmingscht scho paar Sache erläbt, wo chöi schief ga und weiss, was mä när mues mache, das isch doch positiv!

Ds Züri simer de vo mine Grosseutere, mire Tante u mim Unku, zwöi Coucousine (oder ömu irgendwie Verwandti =)), mine Eutere, em Höisu und em Myri u der Dani empfange worde.
And guess what, ds Myri het mir ä Öpfu mitbracht! (das isch itz vilech eher für Insider ;-))
Schins isch dr Öpfukonsum während mire Abwäseheit scho rächt zrügggange, so dass d`Öpfle im Chüuschrank sogar es paar Runzle hei. =)
Nachdäm mir de aune angere tschüss gseit hei und üses Outo sich de doch no irgendwo i däm Parking uffindbar gmacht het, simer heidüset richtig Bärn.
I muess scho säge, dass aues chli angers isch dahie aus ds Wyoming. Das mae z.B. ids Outo "abestigt" anstatt no ä Tritt ufegeit i Suburban. Oder dass d`Outobahn irgendwie änger isch und mä nid i di wiiti Ferni gseht.
U irgendwie hei sech mini Finger a ds ae-oe-ue System gwöhnt und a di liecht angeri Taschtatur, drum muesi sä itz ume umgwane. :-)

Deheime hets de mau Zmittag gäh u när hei Myri, Höisu und Dani no ä Überraschig für mi gha...


es isch ae Schoggimousse-Himbeermousse-Turte mit Beeri-Vanille-Dekoration, sie isch auso mega fein! Und wie chönnts angers si, es het genau 13 roti u wissi Streife und 50 wissi Pünktli, exakt Flaggegetröi =)
Merci viu mau, dir drü!

A dere Steu möchti mi für aui öii Rückmäudige bedanke und für ds a mi dänke!

Hoffe, i gseh öich gli mau, weni de vilech chli weniger müed bi aus grad itze...

So, itz hoffi nur no, mis Gepäck chömi de morn heil a, und mache mi langsam aber sicher uf in Richtig Bett...